E saup com el avia traïda la filla de l’emperador Manuel, que l’emperaire l’avia manada per moiller ab grant tresor et ab grant aver et ab molta honrada compaingnia, e los raubet de tot l’aver que la domna e·ill Grec avian; e com los enviet per mar, marritz e consiros e desconseillatz (...).

Bels Amics Cars, ven s'en ves vos estius,
qu'entorn Nadal vos tramet de sas flors,
e venz febrier, qu'es ja tornatz pascors,
e fug iverns que no·us es agradius.
(...)

E vuelh vos tan, Bels Amics Cars, vezer,
qu'a penas puesc sai mos huelhs retener.
E quar si mes entre·ls gilos aurius
tan honratz plaitz ni tan rica valors,
a nos cortes es trebalhs e dolors;
mas d'una ren no·s fassa nulhs esquius,
s'entr'avols gens no pot rics pretz caber,
car als avols deu tostemps mal saber
so que·l pro fan, per qu'om no·s deu temer.

Del vostre dan, Amics, sui molt caitius,
e quar no·m fai ma domna nulh secors
e destreng mi tan fort la su'amors,
(...)
 

(...)
fals lauzengier gloto
m'an moguda tenso
e lunhat del Peiro,
e·N Drogomans no m'au ni·m ve,
quar mon car Amic part de se.

Tant ai lonjamen sercat
so qu'ops no m'avia,
qu'enaissi o ai trobat
cum ieu o queria.
Perdut ai e mescabat 
so qu'aver solia,
e re non ai gazanhat
don Mos Amics ria.
 

E sobre aquel marrimen el anet vezer l’Emperairitz, moiller d’En Guilem de Monpeslier, que o filla de l’emperador Emanuel, que fo caps e guida de tota valor e de tota cortezia e de totz ensenhamens. E reclament se az ela de la desaventura que l’era venguda. Et ella lo confortet tan quan poc e·l preguet que no·s degues marrir ni desesperar, e qu’el per la so’ amor degues cantar e far chanso (...).

Tan mou de cortesa razo
mos chantars que no·i puosc faillir,
enans i dei miels avenir
qu’anc mais non fi; e sabetz co?
quar l’emperaritz m’en somo,
e plagra·m fort qu’eu m’en giquis
s’il m’o sofris;
mas car ill es sim’ e raitz
d’enseingnamen,
non s’eschai qu’al sieu mandamen
sia mos sabers flacs ni lenz,
anz taing que·s doble mos engenz.

Et aras voil vos dire con el puois s’enamoret de la Emperariz, que fo moillier d’En Guillem de Monpellier, la qal fo filla de l’emperador de Constantinopol –que ac nom Manuel–, la cals fo mandada al rei Anfos d’Aragon (...). E si fo aisi desaventuraz q’en aqela sason qe s’en fo enamoratz, la domna si fo encusada q’ella agues mal fait de Guillem de Monpellier, so[n] marit. E fo cresut per el; si qu’el la mandet via e la parti de si; et ella s’en anet.(...)

Car aissi cantar no·m platz,
si m’en valgues esteners!
pero laissars, non-calers
m’en fora jois e solatz,
oimais, puois n’es mens
l’emperaritz cui jovens
a pujat’ els ausors gratz;
e si·l cors non fos forsatz
eu fera saber
c’om fols si sap decazer.

Mout trahi laich l’emperairitz
Cum fals reis perjurs e savais
Qan pres a qintals et a fais
L’aver que Manuels trames
E la rauba e tot l’arnes;
Pois ab cor dur,
Qan n’ac traich lo vert e·l madur,
El n’enviet per mar marritz
La dompna e·ls Grecs q’el ac trahitz.