Text
Triplum
Je me doi bien doloseir
Et de chanchon faire reposeir
Cant celle ki mun cuer at pris at mari,
Dont trop ai le cuer mari!
Nonporcant raison pieche at
N’ous de chanteir.
Melhour bien m’en puis vanteir,
Car la belle mandeit m’at
K’ultre sun greit
Li at om marit doneit,
Et ke ja ne l’amerat,
Ne por ce ne laisserat
Le bien ameir,
Car trap li seroit ameir.
Anchois ferat
Tant k’ameit bien se porat
Li siens clameir.
Motet
Por coi m’aveis vos doneit,
Mere, mari?
Cant ja par mun greit
Ne fuist ensi
K’a autrui fuisse doneie
K’a celi cui j’ai de moi saisit,
Ki tant m’at honoreie
C’onkes mais nus mieus ne deservit
K’amors li fuist graeie;
Et vos l’en aveis a tort parti!
Diex! j’astoie si bien assenneie,
Et vos m’aveis marïeie! aimi!
Ja saviés vos bien k’avoie amis.
Tenor: DOCEBIT