Dar vuolh ma canso, si·lh platz,
a Na Ponssa part Duratz
quar jois e solatz
e totas bontatz
van doblan
e beutatz
el sieu cors prezan.

Ai! Na Ponsa qual esfortz fatz per vos
car era chant e n'ai null'alegransa
que·lh mortz de mo senhor me desenansa,
car vos sabetz qu'el sabia chauzir
cui devi'hom honrar ni enantir.

(...) Et ella avia una vizina mout bella, qe avia nom ma dompna Ponsa. Mout era cortesa et ensegnada; et ac gran enveja a ma dompna Clara del pretz et de l'henor qe N'Uc li avia facha gasagnar; si se penset et penet con pogues faire q'ella tolgues N'Uc de la soa amistat et traes lo a si. Et mandet per N'Uc, et det li a entendre qe ma dompna Clara avia autre amador a cui elle volia miel qe a lui, et promes de far et de dir so qe a N'Uc plagues. (...)