E s'Amors fai tan qe li lanz
per mos precs sa lanza,
sobre totz autres benananz
aurai benananza;
ez eu non ei sui ges doptanz,
anz sai ses doptanza
qez Andreus sui, don m'er costanz
ez il es Costanza.

Cansos, vai t'en a la gensor qe sia,
a na Costanza d'Est, on tut be van,
qe tan bella non sai ni tan prezan.

Qui vol vezer bel cors e benestan,
e vol vezer on fis prez car s'es mes,
e vol vezer on fina beutatz es,
e vol vezer on nais e viu Honranza,
e vol vezer on nais Jois e Jovenz,
e vol vezer on n'es Valors e Senz,
vegna vezer madompna na Costanza.

[...]

Na Costanza, dompna, ·l vostre cors genz
es de beutat e de prez tan manenz
q'en poriaz feira tener en Franza.