C'est la gieus, la gieus q'en dit en ces prez 
fos ne vendrez mie, dames, caroler. 
La bele Aeliz i vet por joer 
souz la vert olive. 
fos ne vendrez mie caroler es prez, 
que vos n'amez mie. 
G'i doi bien aler et bien caroler, 
car j'ai bele amie.

Main se leva bien faite Aelis.
Vos ne savés que le lousignols dit;
il dist c'amours par faus amans perist.

Belle Aelis une jone pucelle
gardoit aignials lonc une fontenelle
per un matin,
aikes pres d'un vies moulin ;
un mastin
tint loiet en sa cordelle
por la poour d'Isangrin.
Vait regraitant son meschin,
chantoit ceste chansonnete:
tuit li amerous se sont endormi
je sui belle et blonde, se n'a point d'ami.

Cui donrai ge mes amours,
amie, s'a vous non?
Main se levoit Aaliz;
(cui lairai ge mes amours?)
biau se para et vesti
soz la roche Guion.
Cui lairai ge mes amours,
amie, s'a vous non?

Hervis mout souvent manoie
les mains s'amie Aelis.
Hersent a son regart mis
en Fouchier qui se coroie
taupinet et les coispel
tot entor son doit mainel
et sifloit tot a devis,
ausi con li guete Guis
notoit de la lupinele.

Dist Dreus: "Li cuers mi sautele
por l'amor de Biatriz";
et Fouchier forment frestele
pour s'amïete Aeliz;
et Rogier s'amie apele,
si l'a par le chainse pris.

Main s'est levee Aeliz,
qui tou son cuer en deliz
a mis et en faite joie.

Ne sai que plus vos en devis;
ensi avenge a toz amis.
Et je, qui ceste chanson fis
sor la rive de mer, pansis,
comanz a Deu bele Aelis.
Deus, tant par vient sa joie lente
a celui cui ele atalente.