I
"Léit máchet sorge,   vil líebe wünne.
eines hübschen ritters   gewan ich künde:
daz mir den benomen hânt   die merker und ir nît,
des mohte mir mîn herze   níe vrô werden sît."

II
"Ich stuont mir nehtint spâte   an einer zinne,
dô hôrt ich einen rîter   vil wol singen
in Kürenbergers wîse   al ûz der meingîn.
er muoz mir diu lant rûmen,   alder ich geniete mich sîn."

III
Jô tuont ich nehtint spâte   vor dînem bette,
dô getorste ich dich, vrouwe,   niwet wecken.
"des gehazze got den dînen lîp!
jô enwas ich niht ein eber wilde',   sô sprach daz wîp.

IV
"Swenne ich stân aleine   in mînem hemede,
únde ích gedenke an dich,   ritter edele,
sô erblüet sich mîn varwe,   als der rôse an dem dórne tuot,
und gewinnet daz herze   vil manigen trûrigen muot."

V
"Ez hât mir an dem herzen   vil dicke wê getân,
daz mich des geluste,   des ich niht mohte hân
noch niemer mac gewinnen.   daz ist schedelîch.
jône mein ich golt noch silber:   ez ist den líutèn gelîch."

VI
"Ich zôch mir einen valken   mêre danne ein jâr.
dô ich in gezamete,   als ich in wolte hân,
un ich im sîn gevidere   mit golde wol bewant,
er huop sich ûf vil hôhe   und vlouc in ándèriu lant.

VII
Sît sach ich den valken   schône vliegen,
er vuorte an sînem vuoze   sîdîne riemen,
und was im sîn gevidere   alrôt guldîn.
got sende sî zesamene,   die gelíeb wéllen gerne sîn!"

VIII
"Ez gât mir vonme herzen,   daz ich geweine:
ich und mîn geselle   mûezen uns scheiden.
daz machent lügenaere.   got der gebe in leit!
der uns zwei versuonde,   vil wol des waere ich gemeit."