Text
I
Quant vient en mai, que l’on dit as lons jors,
que Franc de France repairent de roi sort,
Reynauz repaire devant el premier front
si s’en passa lez lo mes Arembor,
ainz n’en dengne le chief drecier a mont
e Raynaut amis !
II
Bele Erembors a la fenestre au jor
sor ses genolz tient paile de color;
voit Frans de France qui repairent de cort,
e voit Raynaut devant el premier front :
en haut parole, si a dit sa raison.
e Raynaut amis !
III
“Amis Raynaut, j’ai ja vëu cel jor,
se passisoiz selon mon pere tor,
dolanz fussiez se ne parlasse a vos.”
“jal mesfaistes, fille d’empereor,
autrui amastes, si obliastes nos.”
e Raynaut amis !
IV
“Sire Raynaut, je m’en escondirai :
a cent puceles sor sainz vos jurerai,
a trente dames que avuec moi menrai,
c’onques nul hom fors vostre cors n’amai.
prennez l’emmende et je vos baiserai.”
e Raynaut amis !
V
Li cuens Raynauz en monta lo degree,
gros par espaules, greles par lo baudre;
blonde ot lo poil, menu, recercele :
en nule terre n’ot si biau bachelor.
voit l’Erembors, si commence a plorer.
e Raynaut amis !
VI
Li cuens Raynauz est Montez en la tor,
si s’est assis en un lot point a flors,
dejoste lui se siet belle Erembors.
[…]
lors recomencent lor premieres amors.
e Raynaut amis !