Texto
I
Douce dame, vos aveis prins marit,
Bel et vaillant et jone baicheleir.
Aucune gent qui ne vos ainme mi
Vos font savoir k’il ne fine d’aleir
Deleiz femes. Je vos voil demandeir
Ke me dittes par amors, je vos prie,
Lou keil ariez plus chier, en vos partíe,
Ou lou pooir de lui entierement
Et aillors fut sa volenteit menant,
Ou li pooirs de lui fut mis aillours
Et a vos fut sai volenteit tous jours?
II
Par Deu, Rollant, teil jeu m’averis partit
Ke je cuit vien au millour aseneir.
Je pran lou poir mon marit, jou vos di,
Que j’ai bien cors por teil fais a porteir.
An veude escuele fait trop mavais humeir.
Sa volentei soit par tout otroïe,
Mais ke j’aie de lui la druwerie.
J’ai trop plus chier pooir que vient sovent
Ke volenteit ou je ne pran niant.
Feme ne vaut qui n’ait joie d’amors
Et qui n’en sent nuit et jour lai dousour.
III
Dame, au pïour vos aveis asenti,
Je lou vos voil bien par raison monstreir.
Leiz vos maris gixeis, or soit ansi,
Et bien santeis qu’il ait boin poir d’ovreir,
Mais volenteiz ne s’i welt acordeir,
Ainz lieve sus et lait vos compaignie,
Et si s’en vait ou volenteit li prie.
Vos demoreis marrie, a cuer dolant;
Jalozie vos court sus maintenant
Et fait panceir qu’il ainme autre ke vos,
Dont vos aveis et mezaixe et corrous.