Texto
I
Douce dame, respondez
A ceu ke je vos demant.
Dui chivaillier riche asseis
Sont an .i. païs menant.
Li uns despant largement
A aleir par lou païs
Por conkerre los et pris;
Tot i met, aillors n’antant.
Li autres tient osteil grant,
Bien despandans, grant donor sans lasser,
Et bien se fait a ses vexins douter.
L’un de ces .ij. vos covient resevoir.
Lou keil prixiés vos muez? Dites me voir.
II
Rolan, de ceu ke m’avez
Parti dirai mon samblant.
Cilz doit bien estre honoreis
C’a honor lou sien despant
Et ke se vait travillant
Nut et jor; trop muez l’an prix.
Il doit bien estre saixis
De haute amor de jovant,
Cant por pluie ne por vant
N’est sejornans, s’afiert a bacheler;
Sai en arrier les soloit on amer.
A celui mes cuer et cors et voloir
Qui vait par tout por lui faire valoir.
III
Dame, li tans est remeis,
Li siecles ne valt niant.
Cant .i. jones bachelers
Vait par lou païs errant,
Dongier lou vait porxuant,
Sovant en est asaillis;
Destresse lou xeut toz dis,
Finance faut trop sovant,
Dont armes vont demorant.
Je pris celui, et on lou doit löer,
Boin otelier, large dou sien doner,
Ke bien se fait an son païs savoir
Et bien douter, cant il se vuelt movoir.
IV
Rolans, a tort astriveis,
Et si vos dirai comant:
N’est drois chivailliers nomeis
Qui vait armes esloignant,
Mais cilz qui les vait quairant
Est drois chivailiers gentis;
Avoirs i est bien assis,
Qu’il lou despant noblement.
Car vos saveis vraiement:
Nuns ne conquiert honor par sejorner,
Ne gentis hons ne doit aillors beer
C’a travillier son cors et main et soir,
Tant ke il put et los et pris avoir.
V
Dame, je croi vos saveis
Mieux ke vos n’aleis disant.
Par Deu, j’an sai bien de teilz
Qui ont aleit grandement.
Asseis vait on tesmoignant
Qu’il sont prous, plus n’ont conquis,
Et s’i ont si lou tot mis
Qu’il ne püent en avant;
Et cant avoirs vait faillant,
Honors n’i valt, on les lait bien passer,
Li grant signors ne·s doignent esgarder
Qui aikes ait, on lou seit bien veoir,
Et povres hons n’ait ne veux ne pooir.
VI
Rollans, mes cuers est müez
De vostre fol erremant.
Avoirs vait, mais li bonteis
Est a proudome durant
Ke l’ait aquis an soffrant
Et ait les travalz joïs,
Dont il est d’onor garnis.
Ne devez plus mettre avant
Chivaillier de remenant;
Mais prixiez ciaus qui font chevalz crever,
Lances brixier, banieres vanteler.
Cilz ke ceu fait paie bien son dovoir:
Il se doit bien an haute cort paroir.
VII
Dame, nos plais sont fineis:
Je vos don lou torniant,
Puis k’il vos vient a talant.