Texto
I
Douce dame, ce soit en vos nomer:
Quels volés vos que li vostres amis soit,
Buen chevalier, s’il li covient armer,
Et desarmés n’i ait nul autre esploit
Ne nule rien de courtoisie ait droit -
Tel le vos fas, c’en est l’une partie-
U biaus et bons, de douce compaignie,
Sage et courtois et d’amourous soulas,
Sans prouëce, itel le vous refas.
II
Par Dieu, Perrot, mout fait miex a amer
Li uns des deus ki proëce reçoit.
Boens chevaliers ne puet tant amasser
Males theches que tous jors preus ne soit;
En lui blasmer n’a bone dame droit
En sa mauté ne en sa vilonie.
S’a l’un des .ij. me covient estre amie,
Au preu donrai mes guimples et mes las:
Tost le ferai cortois entre mes bras.
III
Ce n’en iert ja, douce dame vaillans,
Que vers celui puissiés riens adrecier.
Sa proece le doit mout metre avant,
Mais li sorplus vos doit mout anoier;
Car li miens set d’amours le droit mestier,
Si a larghece et sens et cortoisie,
Et la bontés d’ami ne remaint mie.
Bien est honis ki a ces theches faut:
N'est pas preudom ki desarmés ne vaut.
IV
Par Dieu, Perrot, mout vaut miex .i. besans
Que troi tornois, qui a droit veut jugier.
En chevalier ne vaut nule riens tant
Com proëce, c’est son milleur mestier.
Si s’en doit bien bele dame paier
Et oublïer toute sa vilonie.
Pour tous mes mals prenc la chevalerie;
Au preu me tieg, quel part que li jus aut:
Mains en arai blasme, se blasme en saut.