Texto
I
Amis, ki est li muelz vaillans:
Ou cil ki gist toute la nuit
Aveuc s’amie a grant desduit
Et sans faire tot son talent,
Ou cil ki tost vient et tost prent
Et quant il ait fait, si s’en fuit,
Ne jue pais a remenant,
Ains keut la flor et lait le fruit?
II
Dame, ceu ke mes cuers en sent
Vos dirai, maix ne vos anuit:
Del faire viennent li desduit
Et ki lou fait tan soulement
Partir s’en puet ligierement;
Car tuit li autre fait sont vuit
S’on ne·l fait aprés ou davant;
Dont valt muelz li faires, je cuit.
III
Amis, muelz valt li acoleirs
Et li jüers et li joïrs,
Li desduires et li sentirs,
Li proiers et li esgardeirs
Que li faires et puis aleirs,
S’a faire n’est li grans loixirs;
Car trop est doulz li demorers
Et trop est griés li departirs.
IV
Dame, moult est boens li jueirs
Et li baixiers et li gesirs,
Li desduires et li sentirs,
Li proiers et li esgardeirs;
Sans lou faire c’est li tueirs,
C’est la racine des sospirs
Et ceu k’en amors est ameirs;
Dont valt muelz faire et li foirs.
V
Amis, ne tieng pais a amor
Lou tost faire ne tost aleir:
Teille amor ne fait a amer,
Car elle n’ait poent de savor.
Maix cil n’ait pais moult grant dolor
Ke puet a loisir acolleir,
Et baissier ait joie grignor.
En teil amor fait sen entreir.
VI
Dame, onc ne vi guerir nul jor,
Por soi deleis s’amie esteir,
Nullui ki fust navreis d’ameir,
S’on ne li fist aucun boen tor.
Teil amor semble feu en for
Ke ne s’en ait par ou aleir,
Mais enclos ait si grant chalor
C’on ne le puet desalumeir.
VII
Amis, or oeis ke je di:
Quant la bouche et li eul se paist
De la chose c’a cuer li plaist,
Dont n’en ist li feus par ici?
- Dame, je ne di pais ensi,
Maix quant li eulz plux se refait,
Dont trait Amors a cuer son vis
Ke par loial cuer son dairt trait.
VIII
Dame, por Deu, or escouteis:
Li jeus et li gais et li ris
Averont maint home mal mis
Ke li faires ait repaisseis;
Dont valt muelz li faires aisseis,
Tesmoing de Gautier de Pontis,
C’an amor s’an est acordeis.
Or finons la kerelle ci.