Text
Li solaus qui en moy luist est mes deduis,
Et Diex est mes conduis.
I
Et que me deman[dez vous], amis mi[gnoz]?
[Quar a vous] ai tout donné, et cuer et cors.
Et que voulez vous de moy? Voulez ma mort,
Savoreus Jhesucrist?
Li soulaus [qui en moy luist est mes deduis,
Et Diex est mes conduis].
II
Je li feray une tour a mon cuerçon,
Ce sera ou plus biau lieu de ma maison;
Il n’en istra ja nul jour, mon ami douz,
Ains sera en deduit.
Li soulaus [qui en moy luist est mes deduis,
Et Diex est mes conduis].
III
Diex! or ardent cilz bisson par paradis;
Amours les font jubiler et tressaillir.
Fins amans ont tout le temps en Jhesucrist,
Quar c’est tout leur desir.
Li solaus [qui en moy luist est mes deduis,
Et Diex est mes conduis].
IV
Hé mi, lasse! que feray? N’i puis aler.
Esperance et fine amour, quar m’i portez,
Qu’aprez ceste mortel vie i puisse aler:
Ce sont tous mes deduis.
Li solaus [qui en moy luist est mes deduis,
Et Diex est mes conduis].
V
Dame Marie, priez a vostre fil
Qe tant com vivons en ce mortel essil,
Sa grace nouz doint, par quoy soion si fil,
Et en son livre escrit.
Li solauz [qui en moy luist est mes deduis,
Et Diex est mes conduis].