Text
Amis, amis,
Trop me laissie[z en] estrange païs.
I
L'ame qui quiert Dieu de [veraie en]tente
Souvent se plaint [et] forment se demente
Et [s]on ami, cui venue est trop len[te],
Va regretant que ne li atalente.
Amis, amis,
[Trop me laissiez en estrange païs].
II
[T]rop me laissiez [ci] vous longue[m]ent querre.
En [ci]el regnes et en [m]er et en terre;
[E]nclose sui en cest cors qui me serre,
[D]e ceste char qui souvent me fait guerre.
[A]mis, amis,
[Trop me laissiez en estrange païs].
III
[D]ieus, donnez moy ce que mes cuers desirre,
[P]our cui languis, pour cui sui a martire.
[J]hesucrist est mes amis et mon sire,
[L]i biaus, li bons, plus que nul ne scet dire
[A]mis, amis,
[Trop me laissiez en estrange païs].
IV
[M]on createur, quar je sui sa faiture,
[Q]ui me nourrit et de tout me procure,
[M]es arnis est, quar en moy mist tel cure
[Que] par amour se joint a ma nature.
[A]mis, amis,
[Trop me laissiez en estrange païs].
V
[I]l m'apela ains que je l'apelasse,
[S]i me requist ainz qu’aprez lui alasse.
[O]r est bien drois qu’en lui querre me lasse
[S]i que cest mont pour lui trouver trespasse.
[A]mis, amis,
[Trop me laissiez en estrange païs].
VI
[E]t quant j'avray passe ceste bruïne
[O]u li jour faut et le vespre decline,
[Ci]lz qui les cuers alume et enlumine
[Se] moustrera; lors avray joie fine.
[A]mis, amis,
[Trop me laissiez en estrange païs].