I
J'aloie l'autre [jour] errant
Sanz compaignon
Sor mon palefroi, pensant
Quant j'oï, ne sai coment
Lez un boisson
La voix dou plus bel enfant
A faire une chanson, // C'onques veïst nus hom.
Et n'estoit pas enfes si:
N'eùst quinze ans et demi !
Onques nule riens ne vi
De si gente façon.
 

II
Vers li m'en vois en riant,
Mis l'ai a raison; «Bele, dites moi coment,
Por Deu, vos avez non? »
Et ele saut maintenant
A son baston :
« Se vos venez plus avant,
Ja avrez la tançon
Sire, fuiez vos de ci
N'ai cure de tel ami,
Que j'ai mout plus bel choisi
Qu'en clainme Robeçon. »

III
Quant je la vi esfreer
Si durement
Qu'el ne me doigne esgarder
Ne faire autre semblant,
Lors començai a penser
Con faitement
Ele me porroit amer
Et changier son talent.
A terre lez li m'assis.
Com plus regar son cler vis,
Tant est plus les cuers espris
Qui double mon talant.

IV
Lors li pris a demander
Mout belement
Que mi doignast esgarder
Et faire autre semblant.
Ele comence a plorer
Et dit itant :
« Je ne vos puis esgarder,
Ne sai qu'alez querant. »
Vers li me trais, si li di :
« Ma bele, por Deu, merci »
Ele rit, si respondi
« Vos faites paour la gent! »

V
Devant moi lors la montai
Demaintenant
Et trestot droit m'en alai
Lez un bois verdoiant.
Aval les prez esgardai,
S'oï criant
Dous pastors par mi un blef
Qui venoient huant
Et leverent un grant cri.
Assez fis plus que ne di ;
Je la lais, si m'en fui;
N(e) oi cure de telx genz.