Si n'Alazais de Castel e de Massa,
que tot bon pretz ajosta et amassa,
m'en pregava, tota·n seria lassa
anz que m'agues conquist per amador;
gardatz cum es bella, fresca e grassa,
sembla rosa novella de pascor,
e siei beill huoill lanson cairel que passa
del cors al cor, ab una gran doussor.

Pero si·l ve la pros dompna de Massa,
cil que conquer totz iorns pretz et amassa,
e no·l bat tant entro que·n sia lassa,
ja no·il sal Dieus son leial amador,
ni non sia lonc temps fresca ni grassa
ni non teigna son amic en pascor,
car es lo jois que tot autre joi passa
d'aqest segle et ab mais de doussor.