Text
I
Un guerrier per alegrar
vuelh comensar car m'agensa,
que non lo dey plus celar,
trop l'auray tengut en pensa;
e guereiaray d'amor,
en domens de ma guerieira
a trobat guereiador
que guereia volontieira.
II
Guerier, ben vuelh guereiar
ab vos d'amor ses failhensa,
car - sapchas - non puesc trobar
hom de milhor entendensa
ni sia plus fin aimador
ni mielh sapcha la karieira
de ben amar per amor
ni tengua sa laus entieira.
III
Guerieira, sobrelauzar
mi voles per benvolensa;
ben vos vuelh dir ses duptar
- e iur vos per ma crezensa -
que vos est de beutat flor,
que non say, hon ieu mi quieira,
en Tharascon bellazor
que miels del dart d'amor fieira.
IV
Mon guerier, cortes d'amar,
sapchas que gran penedensa
sufri car no·us aus mostrar
l'amistat gran de valensa
qu'ieu vos port, car gran secor
mi fora si la manieira
no fos del lauzengador
maldizen qu'es trop sobrieira.
V
Ma guerieira, am pres clar,
plena de gran conoissensa,
no vulhas per so laisar
qu'ieu suy en vostra plevensa;
car qui am'a sa honor
leialmens ni vertadieira
non deu pas aver temor
de persona lauzengieira.
VI
Guerier, per vostra valor
vos seray lial guerrieira,
car vos portas per lauzor
de savia la bannieira.
Cinco coblas unissonans y una tornada de cuatro versos.