Texto
I
Lasse, pour quoi refusai
Celui qui tant m’a amee?
Lonc tens a a moi musé
Et n’i a merci trouvee.
Lasse, si tres dur cuer ai!
Qu’en dirai?
Forssenee
Fui, plus que desvee,
Quant le refusai.
G’en ferai
Droit a son plesir,
S’il m'en daigne oïr.
II
Certes, bien me doi clamer
Et lasse et maleüree
Quant cil ou n’a point d’amer,
Fors grant douçor et rousee,
Tant doucement me pria
Et n’i a
Recouvree
Merci; forssenee
Fui quant ne l’amai.
G’en ferai
[Droit a son plesir,
S’il m'en daigne oïr].
III
Bien deüst avoir trouvé
Merci quant l’a demandee;
Certes, mal en ai ouvré
Quant je la li ai vëee;
Mult m’a mis en grant esmai.
G’en morrai,
S'acordee
Sanz grant demoree
A lui ne serai.
G’en ferai
Droit [a son plesir,
S’il m’en daigne oïr].
IV
A touz ceus qui l’ont grevé
Dont Deus si fort destinee
Q’il aient les euz crevez
Et les orilles coupees!
Ensi ma dolor perdrai.
Lors dirai:
Genz desvee,
Ma joie est doublee,
Et se mesfet ai,
G’en ferai
[Droit a son plesir,
S’il m’en daigne oïr].
V
Chançon, va sanz delaier
A celui qui tant m’agree.
Pour Dieu li pri et reqier
Viengne a moi sanz demoree.
En sa merci me metrai,
Tost avrai
Pes trouvee,
Se il li agree,
Car je trop mal trai.
G’en ferai
[Droit a son plesir,
S’il m’en daigne oïr].