Texto
G. de Sant Desdier
I
D'una don'ai auzit dir que s'es clamada
del marit, e sai vos dir de qual rancura:
qu'anc no lo·y mes mays de mieg, pus li fon dada,
e del sobreplus volri'a ver drechura,
que la perdoa e·l dan
li mendes tot d'er enan
del sobreplus qu'en rete
e no·lh fezes tort en re.
II
E·l maritz li respondet si cum l'agrada
e dis li cum lo li a mes per mezura:
maior l'a que negus hom de s'encontrada,
qu'esser en poiria ben de mort segura
si non l'anava palpan
qu'a dezmezura l'a gran
qu'aucir la·n poiria be
si no·n avia merce.
III
«Senhors, so que l'auzetz dir es guabairia,
qu'ieu no cre que mos maritz n'aya sobreira,
que ges no·n a la meitat qu'el ditz que sia
- la sofrach'ai ieu sentid'e la necieira;
qu'el ditz qu'auciria m'en,
mas ieu no·n ai espaven,
qu'ieu sai ben qu'el n'a petit
e d'aquel eys m'a mentit».
IV
«Molher, ben avetz talan de la folhia,
e degratz vo·n castiar ab la premeira
qu'ieu aucis que non ac autra malautia
- e vos volriatz murir d'aital manieira!
S'ieu non agues tan de sen
que n'ai avut chauzimen
trop a que for'yssernit
de vos cuy no m'es grazit».
V
«Maritz, del dan vos fas mi bona patz faire:
si o faitz ab aisselui qu'ieu non aus dire
e veramen faitz cridar, quilar ni braire,
per iustiziar mi ren o per aucire.
Ans vo·n rendrai bachalier
quez es feritz e non fier,
e plai li quant es feritz,
e ia no·n er meynhs arditz».
VI
«Molher, pus per messorguier
- si no·l vos met tot entier -
mi tenetz, ben suy trahitz
pueys n'issira l'esperitz».
VII
«Maritz, ia parssa no·n quier
del valeyssent d'un denier,
que motz guaps avem auzitz
que no·y eron mas los critz».
Cinco coblas y dos tornadas de cuatro versos.