Versión N

I
Ar em al freit tems vengut
qu'es neus e gels e faigna
e·ill auselet estan mut
qu'us de cantar non se laigna
e son sec li ram pels plais
que flors ni fuoilla no·i nais
ni·l rusignols non i crida
que am s'en mai nos reissida.

II
Tot ai lo cor deseubut
per qu'eu sui si tot'estraigna,
et sai que l'om a perdut
molt plus tost c'om non gazaigna,
per qu'eu sui en gran esmai
car sai que·m aissi morai;
e s'eu fos enans fenida
ben me tengra per garida.

III
Dompna met molt mal s'amor
que ab ric home plaideia,
a plus aut de vavasor
e si lo fai, ill foleia.
car so diz hom sai e lai:
amor per ricor non vai;
- e dompna que n'es chauzida
en tenc per envilanida.

IV
Amic ai de gran valor
que sobre totz seingnoreia
e non a cor trichador
ves me que s'amor m'autreia.
Eu dic que m'amors l'eschai
- e cel que diz que non fai
Deus li don mal'escarida
qu'eu m'en teing ben per garida.

V
Bels amics, ses cor truan
- car me fes ab vos en gatge -
cortes e de bel semblan,
sol no·m dissessez oltrage;
tost annarem al assai
qu'en vostra merce·m metrai.
- vos m'avez la fe plevida
n·om demandez faillida.

VI
A Dieu coman Belesgar
e puois la ciutat d'Aurenga
e Gloriet'e·l caslar
e·l seingnoriu de Proensa,
e tot cant vol mon be lai;
mas lai on son fait l'assai
perdiei celui c'a ma vida
en serai totz iornz marida.

VII
E s'ieu fail, ab motz verais
d'Aurenga me mou l'esglais,
per qu'eu n'estau esbaida
e·n pert solatz en partida.

VIII
Ioglar, vos c'avez cor gai
ves Narbona portez lai
ma chanso a la fenida
leis cui iois cabdell'e guida.

Versión CDIKd

I
Ar em al freg tems vengut
que·l gels e·l neus e la faingna
e·l auçellet estan mut
c'us de chantar non s'afraingna;
e son sec li ram pels plais
que flors ni foilla no·i nais
ni rossignols non i crida
que am s'en mai me reissida.

II
Tant ai lo cor deseubut
per qu'eu soi a toz estraingna,
e sai que l'om a perdut
molt plus tost que non gasaingna;
e s'ieu faill ab motz verais:
d'Aurenga me moc l'esglais
per qu'eu m'estauc esbaida
e·n pert solatz en partida.

III
Dompna met mot mal s'amor
que ab ric ome plaideia,
ab plus aut de vavasor,
E s'ill o fai il(l) folleia:
car so diz om en Veillai
que ges per ricor non vai,
e dompna que n'es chauzida
en tenc per envilanida.

IV
Amic ai de gran valor
que sobre toz seignoreia,
e non a cor trichador
vas me, que s'amor m'autreia.
Eu dic que m'amors l'eschai,
e cel que dis que non fai
Dieus li don mal'escarida
qu'eu m'en teing fort per guerida.

V
Bels amics, de bon talan
son ab vos toz iorz en gatge
cortez'e de bel semblan,
sol no·m demandes outratge;
tost en veirem a l'assai
qu'en vostra merce·m metrai;
vos m'aves la fe plevida
que no·m demandes faillida.

VI
A Dieu coman Belesgar
e plus la ciutat d'Aurenga
e Gloriet'e·l caslar
e lo seignor de Proenza,
e tot cant vol mon ben lai
e l'arc on son fag l'assai;
cellui perdiei c'a ma vida
en serai toz iorz marida.

VIII
Ioglar que avetz cor gai,
ves Narbona portatz lai
ma chanson a la fenida
lei cui iois e iovenz guida.