Texto
I
Que ferai je, dame de la Chaucie,
S’il est ensi c’on me requiert m’amour?
Conseilliez moi, par vostre courtoisie,
El quel des deus j’avrai plus grant honnour:
Ou ce que je lesse a celui tout dire
Sa volenté, ou ançois l’escondire?
Par fine amour, loez m’ent le meillour.
II
Damoisele, de la moie partie
Vous loe bien et pour vostre valor
Que vous vueilliez souffrir que cil vous die
Sa volenté, sans lui metre en errour;
Qu’en lui oiant porrez vous bien eslire
Se il vous plaist l’otroi ou le desdire,
Et si savrez s’il dist sens ou folour.
III
Dame, c’est voirs, mes fame ne doit mie
Home escouter, ains doit avoir paour
Qu’ele ne soit a l’oïr engignie,
Quar home sont trop grant losengeour
Et leur raisons sevent tant bel descrire
Qu’en eulz oiant puet a cele souffire
Chose dont tost cherroit en deshonour.
IV
Damoisele, poi est de sens garnie
Fame qui chiet pour parole en freour
D’omme, s’il n'est cheüz en frenesie.
Bien escouter donne sens et vigour
De bel parler, ci a bel maestire.
Ja pour oïr homme n’iert fame pire
S’el ne se veult obeïr a folour.
V
Dame, bien voi tost seriez otroïe
A home oïr, se veniez a ce tour;
Mes, se Dieu plest, je n’iere ja moquie
D’omme vivant, ne de nuit ne de jour,
Quar de bien fait sevent il tost mesdire;
Pour ce, les vueil au premier desconfire,
Si que nulz n’ost a moi fere retour.