Texto
I
Je vous pri, dame Maroie,
Ke respondés contre moi.
Une dame simple et choie
Est bien amee de foi,
Et ele aime bien ausi,
Ce saciés vous tout de fi;
Mais cil est de tel maniere
Ki l’aime ke sa proiiere
N’ose pas gehir,
Et si ne puet avenir
Ke ja li faice savoir.
S’or me voliés dire voir,
S’en doit ele deschovrir,
U ele s’en doit tasir?
II
Dame Margot, bien vauroie
Droit gugier sans estreloi.
Puis k’Amours si les maistroie
K’il aiment bien ambedoi
De chuer loiaument, je di:
Se cil n’a le cuer hardi
De dire ke il l’ait ciere,
Pas ne doit cele estre fiere,
Ains doit obeïr
Son cuer et sa bouce ouvrir
Pour l’amour faire aparoir.
Puis ke cil n’en a pooir,
Ele le doit parfurnir,
Se de l’amor veut joïr.
III
Vous n’alés pas droite voie,
Dame Marote, je croi.
Trop mesprent dame ki proie
Son ami avant. Pour koi
S’aveilleroit elle si?
Se cil a le cuer falli,
Ne di jou pas k’il afiere
Por ce k’ele le reqiere,
Ains s'en doit chovrir
Et les fais d’Amours soufrir
Sans ja faire percevoir;
Kar feme doit tant valoir
Que n’en doit parole issir
Ki son pris puist amenrir.
IV
Dame Margot, bien quidoie
Miex entendisiés .i. poi
En amours; je vous avoie
Le droit jugé, mais bien voi
Ke vous estes contre mi
A vo tort. Je vous afi:
Boine amour n’ert ja entiere
Q'aucune folours n’i fiere.
Nus n’en puet partir
Sans folour, dont face oïr
Cele a celui son voloir.
Folie convient avoir
A boine amour maintenir
Ki en veut les biens sentir.
V
Dame Marote, i foloie
Ki veut; mais mie n’otroi.
Ke d'Amours puist avoir joie
Fol ne fole, ki n’ont loi.
Ne soustenés mais ensi
Ke dame prit son ami;
Ke, s’ele en est coustumiere,
Ele se met tant ariere
C’on l’en doit haïr.
Autrement s’en doit couvrir:
Kere doit par son savoir
Ke le puist souvent veoir,
Parler et les lui seïr;
Bien s’en doit a tant tenir.
VI
D’amours ne savés .i. troie,
Dame Margot, tres bien voi.
Cele est fole ki monoie
Prent pour faire a li dannoi,
Kar point n’a d’amour en li;
Mais qant doi cuer sont saisi
D’amours ki n’est losengiere,
Bien est cose droituriere
Dire son plaisir
A son ami par desir,
Ains c’on kiece en desespoir.
Miex vient en joie manoir
Par proier q’adés langir
Par trop taire et puis morir.