Texto
I
Dites, dame, li keilz s’aquitait muelz
Envers amors: uns anfes de juvant
De .xv. ans fut en amors entantis,
Si amait tant ke il ot .l. ans,
Pués lait amors tous haitiez et tous sains,
Ou cil ki out .xl. ans ou plusains
Conqes amaist, puis se prist a ameir,
Et amait puis tant com il pout dureir?
II
Biaus dous sire, il n'est mies soutis.
Ki de ces .ij. ne seit lou jugemant.
Puis ke li hons atant tant k’il est vieus
Ainsois k’il aint, il ait mauvaisemant
Servit amors, de ce suis touz certains:
Car en amor doit li hons premerains
Metre son tens et jonece useir
Et, cant est vieus, a Deu merci crieir.
III
Sachiez, dame, c’auteir mestier ait cil
De Deu servir ki vient novellemant
Com uns anneis, car tout prant a son chois
Amors ausi an son chois chascun prant:
L’un prant anuit et l’autre au dariens,
Et cant aucuns s’est en amors enpoint;
Cil ke trait ne se puet ancuseir,
Mais cil ki sert jusc’a la fin est beirs.
IV
Biaus dous sire, mal estes antantis
Se vos creeis k’il soit si faitemant
C’on ne puet estre en amor trop tarris,
Puis c’on i soit jusc’au definemant.
Vous saveis bien ke li maus tient en rains,
Dont li vielars an sont ovriers dou moins;
Puis .xl. ans ne fait hons fors c’aleir,
Pou vaut on puis por deduit demeneir.
V
Dame, meus vaut .i. lans ovriers tarris
C’uns boins miaus ki d’ovreir se repant.
Li amors nait dou cuers, c’est ses drois leus;
Elle ne vient pas des rains tan ne quant,
Car ‘'un viel tor une vache meus prant
Ke d’un jone vel ke houce et n’en chiet rans.
C’est geu d’anfant commanceir sans fineir:
La bone fin fait l’ovraige loeir.