Texto
I
Dame de Gosnai, gardez
Que soiez bien conseillie:
A Robert Bosquet parlez
Tant qu’il soit de vostre aïe.
Je vous part, seignor avrez:
S’a vo voloir le prenez,
C’iert sans le gré vos amis
- Ensi est le jeu partis
Ou vous l’avrez par leur gré
Maugré vostre volenté.
II
Gilebert, c’est grans vieutez
A dame d’user sa vie
Aveuc home qui amez
N’est de lui; mes ne doi míe
Contre tous mes foulz pensez,
S’aim mieux faire pis assez
Par leur los et par leur dis.
A ce me tenrai tout dis
Ne ja ne m’iert reprouvé
Qu’aie conseil refusé.
III
Dame, retenu avez
Le pïour en vo partie.
De joie vous departez,
Si estes trop forvoïe.
Des ore mais soufferrez
Soulas trop malz savourez,
S’iert vos jugemens enquis
As vrais amans du païs
De ce qu’avez trespassé
Ce qu’Amours a commandé.
IV
Gilebert, vous mesprenez.
Amours veult bien et otrie
Que joie et ses biens doublez
Ait dame qui se marie;
Et je croi tant mes privez
Qu’a leur pooir m’iert donnez
Autieux ou mieudres maris
Que se je l’eüsse pris.
S’aim bien ce que m’ont greé
Et s’ai grant blasme eschivé.
V
Dame, bien sai que savez
Assez sens et cortoisie;
Tant iert vo cuers plus desvez
S’Amours est par vous traïe.
Pour Dieu, or vous repentez!
Jamais Robert ne creez!
Bien sai qu’il a conseil mis
A ce que vous avez pris.
Portez Amours loiauté,
Si vous iert tout pardonné.
VI
Gilebert, vous me tenez
A sage et a bien norrie;
Pour tant cuidier ne devez
Que je face desverie.
Ains m’est li mieudres remez;
[...]
Robert m’a bon conseil quis,
Mes vous vous estes partis
Du droit, s’avez mal ouvré,
S’avrez blasme et je bonté.
VII
Hue d’Arras, soustenez
Le droit d’Amours et parlez
A teus drois de nos estris
- En vous m’en sui du tout mis -
Et, s’il vous plest, si chantez
Ce chant quant apris l’arez.