Texto
I
Bona dona, d'una re que·us deman
mi digaz ver, segon vostre semblan:
s'us vostre fis amics vos ama tan
c'altra ves vos non razona ni·n blan,
ar mi digaz segon vostre veiaire
si l'amerez o sofrirez son dan
- q'eu sui aqel que lo·ill sabrai retraire.
II
E vos digaz, fei qe·m devez, Bertran,
cals es l'amics qe·l volh saber enan,
qu'eu tem de vos - per que vau plus doptan -
que vos siaz messagiers per engan;
donc sabrez greu que n'ai en cor a faire
qu'eu no voill dir tan sopte mon talan,
que ses mentir no m'en pogues estraire.
III
Domna, s'eu fos aqel que vos cuiaz,
que·us enqueses, be i for' enganaz
[- qar vos aug dir so don soi iraz -]
per amor cel qu'es vostr'endomeniaz
e·us ama tan que non tem nuill maltraire
per vostr'amor; e vos, donna, si·us plaz,
voillaz c'ab ioi lo seus tristz cors s'esclaire.
IV
Per vostr'amor, Bertran, car m'en pregaz,
l'amarai eu, mas el er pauc amaz,
qu'eu no·ill promet ni nuill respeit no·ill faz
que·ill do m'amor, car s'es ves mi celaz;
ni eu non cre c'amors l'apoder gaire,
que, s'ill ames ni·l forces voluntaz,
calque semblan feira que fos amaire.
V
Donna, eu sui lo vostr'amics aitals,
fis e fecels, vers e dreiç e leials;
e serai vos de servir tan venals
que ia no m'er affanz a soffrir mals.
E vos, donna, si cum es de bon aire,
retenez mi, que ben es vostre sals,
ab tan que ia de re vas vos no·m vaire.
VI
Amics Bertran, ben es iocs cumunals
q'eu am celui qu'es mos amics corals,
e l'amics voill que sia, sabez cals?
Fis e ficels, vertadiers e no fals,
ni trop parliers ni ianglos ni gabaire,
mas de bon prez - a son poder sivals
c'aissi cove - fors e dinz son repaire.
VII
Donna, cel sui que non enten en als
ni ves altra mos cors no·s pot atraire.
VIII
Amics Bertran, ben deu anar cabals
druz, cant es francs, fiçels e non trichaire.
6 coblas doblas y 2 tornadas de dos versos.