Texto
Arnaut Plages
I
«Ben volgra midons saubes
mon cor ayssi cum yeu·l say
e que·l plagues qu'ieu fos lay
on es sos guays cors cortes.
E si die sobransaria?»
«Digas, e cuias que sia?»
«Yeu non, que no·m sent tan ricx.»
«Suefre e no t'amendicx;
que de ben leu s'avenria.»
II
«Avenir pot? No pot ges.»
«Si pot lo.» «Per Dieu, no fay.
- E quom?» «Yeu vos o dirai.»
«Diguatz cum.» «S'a lieys plagues.»
«Plazer? A leys, cum plairia?»
«Levet, s'Amors o volia.»
«Amors?» «Yest Ii enemicx?»
«Yeu no, ans estauc enicx
a quascun que la gualia.»
III
«Suefre e venra t'en bes.»
«E cum? Que·ls mals ades n'ay.»
«Mals? Non lo diguas iamay.»
«E per que?» «Quar non o es.»
«Non es mals qu'aissi m'aucia
languen?» «Non ges, quar un dia
er tos bes, si no ten gicx,
ab sol que no la cambicx.»
«E morray?» «Oc, si·s volia.»
IV
«Si·s vol?» «Oc.» «Valra·m merces
ab lieys?» «Per Dieu, non o say.»
«E per que?» «Quar no s'eschai
que trop t'iest en ric luec mes.»
«Ric, per crotz, ben o sabia.»
«E doncs no fezist follia?
Laissa t'en.» «No m'en casticx,
qu'aisso non es mas destricx
que ia no men layssaria.»
V
«No t'en laissarias ges?»
«Non yeu.» « Doncs aissi o fay
cum ieu t'o ensenharai:
sias adreitz e cortes,
francs e de bella paria,
e fay so que ben estia,
quan poiras, e no t'en tricx;
qu'aissi deu renhar amicx.»
«Oc, e mielhs si mielhs podia.
VI
Na Felipa, s'ieu avia
tals rictaz don ieu fos ricx,
altressi·us seri'amicx
de ben dir si cum solia.»
VII
[Chanso, en Castella ten via,
al rei qu'adoba·ls destricx,
qu'om pren ab los avols ricx
quant es en lor companhia.]
5 coblas unissonans capfinidas (excepto entre II y III) y dos tornadas