Texto
I
'Nu ist ez ein ende komen, dar nâch mîn hérze ie ranc,
daz mich ein edeliu vrowe hât genomen in ir getwanc.
der bin ich worden undertân,
als das schif dem stíurmán,
swanne der wâc sîn ünde álsô gar gelâzen hât.
sô hôh ôwî!
si benimt mir mange wilde tât.'
II
"Jâ hœre ich vil der tugende sagen von eime ritter guot;
der ist mir âne mâze komen in mînen stæten muot.
daz sîn ze keiner zît mîn lîp
mac vergezzen", redte ein wîp,
"nu muoz ich al der werlte haben dur sînen willen rât.
sô hôh ôwî!
wol ime, wie [] er daz gedienet hât!"
III
'Wie möhte mir mîn herze werden iemer rehte vruot,
daz mir ein edeliu vrouwe alsô vil ze leide tuot!
der ich vil gedienet hân,
als ir wille was getân.
nû wil sî gedenken niht der mangen sorgen mîn.
sô hôh ôwî,
sol ich ir lange vrömde sîn.'