(...)
Si tot m'aves, Mais d'Amic, cor irat,
a vostr'ops ai Miraval si gardat,
que vos l'aves et eu n'ai enemigas.
 

Mais d'Amic, ma conoissenssa
toilla·m Dieus, si·m part de vos
Miraval ni mas chansos;
qe·l vostre tortz vuoill qe·m venssa.
 

Mais d'Amic, pretz vos es e sens,
si voletz mos enantimens;
c'anc Miravals no·us volc faillir.
 

Mais d'Amic, Dieus benezia
qui vol que·m siatz amia,
e s'ie·us ai fag plazer ni onramen,
enquer si·us platz o farai per un cen.
 

(...)
Bels Mais d'Amic, si be·us m'es malvolens,
de Miraval es vostre·l mandamens.

Mais d'Amic, on qu'ieu m'an,
vos es caps de mon chan
e de Miraval poestatz,
mas no vueill que l'anel perdatz.

Dreg a mon belh Mai d'Amic
t'en vai, chansos, qu'ilh t'entenda,
e si tan fai que t'aprenda,
ben tenh mon chantar per ric;
qe re qu'ilh pretz no·s bayssa ni·s gavanha,
que·l sieus lauzars daur' e·l blasmars estanha;
tan sap e conoys et enten
qu'ades val mais la part qu'ilh pren.
 

Mais d'Amic, los bes e·ls mals
degr' om partir comunals,
mas vos n'avetz lo gaug e·l pretz e·l pro,
et ieu no n'ai mais ir' e cor fello.
Mantel, plus qu'enperials
es, qu'en vos non a ren fals,
or ni tessel ni fonda ni peno,
ni mais ni meins no·i cove per razo.
 

La Loba ditz que seus so
Et a·n ben drech e razo,
Que, per ma fe, mielhs sui sieus
Que no sui d'autrui ni mieus. 

Que·l cor ai tan fello
Vas liei qu’anc mala fos;
Quar per un comte ros
M’a gitat a bando.
Be·m par que loba es,
Quar ab comte s’empres
E·s part d’emperador,
Qui fag a sa lauzor
Per tot lo mon saber:
Mas qui ment no ditz ver.

Tart mi veiran mei amic en Tolzan
E tart veirai lo Pueg e Monrial,
Que remazutz sui del tot a'N Barral,
Mon bell Rainier, que truep fin e certan.
A! Na Loba, dona, quar no·us remir,
Dels heulhs vos plor e del cor vos sospir,
Quan mi membra vostre cors avinens
E·l dous parlars e la cara rizens.

Per tostemps lais Albeges
E remanh en Carcasses,
Que·lh cavalier son cortes
E la domnas del pais,
Pos la Lob’a·m si conques,
Que si m’ajut Dieus ni fes,
Al cor m’estan siei dous ris.

Mas ja non cug hom qu'ieu m'abais
Pels rics, si·s tornon sordeyor;
Qu'us fis jois me capdell'e·m pais
Qui·m te jauzent en gran doussor
E·m sojorn'en fin'amistat
De lieis que plus mi ven a grat:
E si voletz saber quals es,
Demandatz la en Carcasses. 

Mas el si amava una dona de Carcases, que avia nom Loba de Pueinautier, filha d’En R. de Puegnautier, et era moiller d’un cavalier ric e poderos de Cabares e parers del castel de Cabaretz. La Loba si era sobravinens e bela e corteza et ensenhada, e volontoza de pretz e d’onor; e tuit li valen home e·ill valen baro de l’encontrada, e l’estranh que la vezion si entendion en ela: lo coms de Fois, En Oliviers de Saisac, En Peire Rotgiers de Mirapeis, En Aimericx de Monreial e·N Peire Vidal, que fes maintas bonas chansos de leis.

(...) Et el si amava la Loba de Pueinautier e ma dona Estefania, qu’era de Sardanha. (...) La Loba si era de Carcases, e Peire Vidal si se fazia apel·lar Lop per ela e portava armas de Lop. Et en la montanha de Cabaretz si se fes cassar als pastors ab los masti et ab los lebrers, si com hom fai lop. E vesti una pel de lop per donar az entendre als pastors et als cans qu'el fos lop. E li pastor ab lur cans lo casseron e·l bateron si en tal guiza qu'el en fo portatz per mort a l'alberc de la Loba de Pueinautier. (...)