Et qan foron al chastel, si foron ben acuilliz per En Robert de Tarascon, q’era maritz de ma dompna Agnes, la seror de ma dompna Margarida, e de ma dopna Agnes autresi. Et mon segnor R[aimon] pres ma dopna Agnes par la man e mena la en chambra; e si s’aseton sobra lo lieg. (…) A la fin tant la preget q’ella dis c’amava Guillelm de Cabestaing. Aqest dis ella per zo q’ella vezia Guillelm marrit e pensan, et sabia ben com el amava sa seror; don ella se temia qe R[aimon] non crezes mal de Guillelm. (…) Aqesta rason dis la dompna a son marit; e·l marit li respondet qe ben avia fach et det li parola q’ela poges far o dir tot zo qe fos escampamen de G[uillelm]. Et la dopna ben o fetz.