(...) Et entendet se en la marquesa de Polonhac, qu'era sor del Dalfin d'Alverne e de Na Sail de Claustra, e moiller del vescomte de Polonhac. En Guillems de Saint Leidier si fasia sas cansos d'ella e l'amava per amor e disia li "Bertran"; et a·N Ugo Marescal disia altresi "Bertran", qu'era sos compaing e sabia tot lo faich e·l dic de Guillem de San Leidier e de la marquesa (...)

Dig vos ai d'En Guilem qui fo ni don. E si amava la comtessa de Polonhac, la cals avia nom Marqueza, si com vos avetz auzit. Molt era savia et ensenhada. En Guilems de Saint Leidier si l'avia amada et onrada longua sazo e fazia sas chansos d'ela, et ella no·l volia retener per cavalier ni far negun plazer endreg d'amor; ans, quan venc a la perfi, si·ll dis la vescomtessa: "Guilem, si·l vescoms, mos maritz, no m'o comandava e no m'en preguava, ieu no tenria vos per cavalier ni per servidor" (...).

A la Marcheza vei son pretz montar
cui eu soi hom e serai o jase,
estier midonz, qe d'autra no·m sove
senz joi jauzir mais qan lo dezirar.

Be·m cujava que no chantes oguan,
si tot m’es grieu, pel dan qu’ai pres, e·m peza
que mandamen n’ai avut e coman
d’on tot mi plaz, de midons la Marqueza.

(...)

Dampnatge m’es quar no suy poderos
de lieys vezer, que ten mon cor en guatge,
et estau sai, don totas mas chansos
tramet ades, quar las vol, per uzatge
a Tot-mi-plaz, la belha d’aut paratge;
e plagra·m pauc chans, si per lieys no fos,
mas qui lieys ve ni sas plazens faissos,
no·s pot tener de joy ni d’alegratge.

En Tot-mi-plai, mout vos ai en coratge
et am vos mout, ses totas ochaizos
qu’apres midons res non am tan quan vos,
et es ben dregz qu’ilh n’aya l’avantatge.

Lo vers es faitz qui l’aprendia.
En Peirols vol que sabutz sia
en Vianes, on pretz non pot cazer,
que·l marquesa l’i fai ben mantener.