Text
I
Plaine d’ire et de desconfort
Plor: en chantant m’en rededui.
Sachiez de fi que j’ai grant tort,
Car assez trop hardie fui
Quant mon cuer ne ma boiche mui
A rien qui tenist a deport,
Se por ceu non q’ensi recort
M’ire et mon duel et mon enui.
II
Dame cuidoie estre d’autrui,
Mais bien sai que folie fis,
Car conquise sui par celui
Cui je cuidoie avoir conquis.
Or en est devers moi li pis,
Car il siens est et je si sui:
Ensi somes sien ambedui,
S’il est ensi com je devis.
III
Trop ai vilainement mespris
Cant malgré suen soie me faz,
Qu’il n’a cure, ce m’est avis,
Ne de moi ne de mon solaz;
Desqu’il ne m’ainme, je me haz,
Et s’amie serai toz dis,
Encor soit il mes enemis:
Ensi ma mort quier et porchaz.