Text
I
Dites, seignor, que devroit on jugier
D'un traïtour qui faisoit a entendre
Que il avoit m’amour sanz destorber?
Mais ce n’iert ja, Dex m’en puisse deffendre!
Prenez le moi, sou me faites lier
Et sor l’eschiele monter sanz lui descendre,
Que nul avoir
N’en porroie je prendre,
Ainz morra voir.
II
Dame, merci: confession requier.
De mes pechiez me vuil corpaubles rendre
Vers vos, dame, cui cuidoie engignier.
Li deables le me fist entreprendre.
Cuidiiez vos que deüsse endurer
Les maus d’amer? Nenil, mie le moindre;
Por vos avoir
Je·l vos faisoie entendre
Por decevoir.
III
Par Deu, ribauz, quant li autre savront,
Li tricheour, que tex est ma justice,
Que vos avroiz les ieuz sachiez dou front,
Ja mes par aux n’iert tel dame requise.
De la paour li autre s’en fuiront:
Lors verra l’en les leaus sanz faintise
Apertement,
Quant la lengue iert jus mise
Qui d’amors ment.