Text
I
Douce dame, volantiers
Saroie, s’il vos plaixoit,
Lou keil miex vos ameriés,
Se estre lou covenoit:
Ou chivaillier orguillous,
Qui a chascuns choseroit
Ne nul desdut ne vorroit,
Ou un autre, mesdixant,
Qui toz jors rioteroit
Ne gracious ne seroit.
II
Rolan, je n’an sai jugier,
Ke bone dame n’ait droit
K’elle se doie acointier
A chivaillier de teil ploit;
Et se panre l’un des .ij.
Me couvenoit orandroit,
Li orguillous m’averoit.
Ja n’amerai mon vivant
Mesdisans, nuns ne les doit;
Chascun fuïr les devroit.
III
Dame, j'an voil desrainier
Contre vous, comant qu’il soit.
Vous aveis pris lou mestier
Ke toz li mons haïr doit:
Orgoilz est pires de tous.
Mesdisans bien s’aparsoit,
Mais orguillous ne poroit.
Toz jors li est au devant
Despis, qu’il ne sofferoit
Qu’il paiast Amours nul droit.
IV
Rolan, j'ainme chivaillier
Que por riens ne mesdiroit.
Je vuel l’orguilloz, lou fier,
Qui nul desdut n’averoit.
Orguillous doit estre prous.
Amors, s’i ci ambatoit,
Toz malz laissier li feroit.
Mais langue de mesdisant
Ocist proudome et dessoit,
Et fait de l’anver lou droit.
V
Dame, orguillous ne tient chier
Home qui antor lui soit:
Choser vuelt et despitier.
Sa nature lou desoit.
Orguillous est covoitoz,
Li pires visces qui soit:
Li uns de l’autre consoit.
Teilz mesdit qui s’an repant
Aprés, cant il s’aparsoit;
Mais orgoilz ploier ne doit.
VI
Rollans, ne poiez noier
Mesdixans pires ne soit:
Mesdixans et losangiers
Ont mis lou monde a destroit.
Coumant seroit amerous
Cuers que teil home vairoit,
Qui toz jors rioteroit,
Mal gracious, mal plaisant?
Qui an jugeroit a droit,
Chascuns haïr les devroit.