Text
I
Na Maria, pretz e fina valors,
e·l gioi e·l sen e la fina beutatz,
e l'acuglir e·l pretz e las onors,
e·l gent parlar e l'avinen solatz,
e la dous cara, la gaia cuendanza,
e·l douz esgart e l'amoros semblan,
ce son en vos, don non avetz egansa,
me fan traire vas vos ses cor truan.
II
Per ce vos prec, si·us platz, ce fin'amors
e gausiment e douz umilitatz
me puosca far ab vos tan de socors
ce mi donetz, bella domna, si·us platz,
so don plus ai d'aver gioi esperansa;
car en vos ai mon cor e mon talan
e per vos ai tut so c'ai d'alegransa,
e per vos vauc mantas vez sospiran.
III
E car beutatz e valors vos onransa
sobra tutas, c'una no·us es denan,
vos prec, si·us platz, per so ce·us es onransa
ce non ametz entendidor truan.
IV
Bella dompna, cui pretz e gioi enansa,
e gent parlar, a vos mas coblas man,
car en vos es saess' e alegransa,
e tot lo ben c'om en dona deman.
2 coblas unissonans y 2 tornadas de cuatro versos.