Text
I
Quant aug chantar lo gal sus en l'erbos
e·l pic e·l iai e·l merl'e·l coaros
e·l rossignol e l'aguisat perier,
farai un vers ses prec e ses somos.
Ma domn'es tan bell'e cortes'e pros
que·m fai loirar plus que falcos lanier.
II
Seingner, tan m'es mals e contrarios,
cent ves ai cor que mi parta de vos,
mais anc non vi home tan plasentier.
Mas d'una ren est ben aventuros:
qant sent venir esterlins orgoillos,
ades m'escont en granj'o en sellier.
III
Domna, tostemps vos ai mon cor cellat:
per que n'avez de mi lauzor e grat
quant non amest cusson ni fatonier,
anz lo fugist com eu tornei rengat
qu'anc no·i fos pois, pos m'o agues vedat.
Mais am flauzons e sopas en sabrier.
IV
Seigner, tostemps vos aurei prezicat
que vendessem so maior porc faissat
e vestissem Miquel, so berbeguier;
fezessem li blizaut fendut trepat
- tant a gen cors e bella maiestat,
cent vez er pres a lei de cavallier.
V
Domna, Miquels volria fos pendutz,
que tant l'amas qu'en son per fols tengutz,
lo bacalar trachor mensoneguier.
Que ar vos iur encontra sas vertutz
que ia Miquels ni sos avers lanutz
non estara ab vos un an entier.
VI
Seingner, cals es aicel c'om a tondutz
- uns grans, uns loncs, ab esperos agutz,
entopenatz a lei de cavallier?
Tant me mandet amistatz e salutz
e·m grazis mais que si fos bous cornutz,
car dei un pol a son tersol lanier.
6 coblas doblas; la rima b es fija en -ier.