Ben avetz auzit de ma dompna Maria de Ventedorn com ella fo la plus preziada dompna qe anc fos en Lemozin, et aqella qe plus fetz de be e plus se gardet de mal. E totas vetz l'ajudet sos senz, e follors no·ill fetz far follia. Et onret la Deus de bel plazen cors avinen, ses maestria. (...)

Bels dous Maracdes fis,
vos e·ls pros Peitavis
sal Dieus, e Na Maria
qu’a bon pretz conquis
e ma domna Elis
sapcha be, ses bausia
qu’eu li sui aclis
on qu’eu an ni estia.

Na Maria, tant es la grans valors
q’en vos estai, bona dompna, e reigna,
q’ie-m meravill que nuills cors la sosteigna
e chascun jorn creissetz als trobadors
avinens faitz, don crescan las lauzors.

Na Maria, tan vei plazen
tot so q’a vos platz far e dire,
per qe’us son tuich obedien
li cortes e-il bon e-il valen !

Na Maria, tant son honrat li be
que son en vos, per que-n a grand honranssa
cel que lauza vostre pretz e-l mante,
e totz lo mons s’en dona alegranssa.

Dompn’ab finas beutatz,
pros e de gran valensa,
Na Maria, gratz
vos es tals dos donatz
que, segon ma crezenssa,
vos vei acordatz
totz, los pros e-ls malvatz.

Na Maria, vos
etz tant bella, e pros,
que non es emperaire
el mon que non fos
onratz pels vostres dos.

Na Maria, tan
avetz de pretz gran
per que son tuich d’agradatge
miei dich e miei chan,
per la lauzor gran
q’ieu dic de vos en chantan.

Na Maria, tantz bes faitz de vos dir,
per qe no-n cal a mi de vos ben dire.

Na Maria, dompna, si Dieus mi sal
gent enanssa vostre pretz e gent val. 

N’Ugo, a pauc no·n cossen,
qe dregz e razos seria.
E faza·n lo jutjamen
a Ventadorn Na Maria,
on es pretz e cortesia.

Na Maria, dompna gaia,
vos non etz de tal saber,
car non faitz ren que desplaia,
anz plai tot e deu plazer.

Na Maria, tant es
Vostre pretz cars e bos,
Qu'en comtan ni ab sos
Non cre hom dir pogues
Las grans valors ni·ls bes.

S'eu vos voill tan gent lauzar
Con taing a vostra valenza,
Na Maria, cui Dieus gar
D'enueis, ben sai ses faillenza
Que toz temps m'er a pensar
(...)

Si ja rasos no·m disia
Que de midonz Na Maria
Parles re que fos benestan,
Veritatz mi fai dir d’aitan;
Que·l sieus noms es sobr’autres noms grasitz,
E·il sieu fait son de pretz cims e razitz.

Na Maria, soven
M’agratz a ben disen;
Mas d’altres n’i a tans
Que no·i es ops mos chans.

E s’amors val, ylh val per Na Maria,
On es beutatz, e cortezi’e jais.

(...)

E ditz: «Mout ai gran feunia
Quar vos aug castiador,
Vos que dig avetz manh dia
Mal de domnas e d'amor,
Per qu'eu sui en gran error:
Ar sai que ver ditz Maria,
Quant ilh dis que cantador
Son leugier e camjador. »

(...)
E per que no·m digatz de no,
Faza·n dreg Na Maria dir,
Cui jois e pretz renovella,
E fara sen, si apella
Na Biatritz, la bella, de Tiern.

A Maria de Ventedorn vai dir,
Chansoneta, qu'ieu sui al sieu servir.

Gauselms, vencutz etz del conten,
vos e N’Ugo, certanamen.
E voill q'en fassa·l jutjamen
Mos Gardacors, qe m’a conqes,
e Na Maria on bons pretz es.

Seigner, cill per cui Lemozis
Recep per tot lo mon honor,
Na Maria de Ventedor,
Dira que ben faitz gran faillensa
Car vos avetz aital crezensa.

(...) Et ella era filla del vescomte de Torena e seror de ma dompna Maria de Ventadorn e de N'Elis de Monfort

Mas si ac tan de cor qu'el s'enamoret de ma dona Maria de Ventadorn, de la meillor dona e de la plus valen c'om en aquela sazo saubes en nuilla part. (...)

E ma dona Maria si mandet per una dona que avia nom ma dona N'Audiartz de Malamort. (...) Ma dona Maria si fo molt alegra quant auzit aiso, e si la preguet molt qu'ela lo·I complis. Ma dona N'Audiartz s'en anet e se partit de ma dona Maria. (...)

Et ella li dis molt amorozamen qu'el' avia gran piatat de lui, quar sabia qu'el amava ma dona Maria. (...) ab aital coven que vos deiatz penre comjat de ma dona Maria de Ventadorn e qu'en fasatz una chanso rancurant vos d'ela cortezamen. (...)

De far e de dir tot so qu'ela comandava e de partir de ma dona Maria son cor e s'amor e sos precx e sos chans. (...) Gauselms s'en anet ples de joi e de gran alegransa, pensan com pogues fer tal chanso que ma dona Maria saubes qu'el era partitz d'ela e que n'avia trobada autra que l'avia retengut ab se. (...)

Aquesta chansos fo chantada tan que ma dona Maria ho saup; e molt s'en alegret ma dona Maria, e ma dona N'Audiartz autressi s'en alegret molt d'aquesta chanso, quar ela conoc be qu'el avia partit son cor e son chan de ma dona Maria. (...)

En Gauselms si fo al pe d'ela e si dis com el avia fait son comandamen e com s'era partitz de ma dona Maria per ella. (...)

Gauselms (...) si se levet e s'en anet com hom dezesperatz (...) qu'ela l'avia fait partir de ma dona Maria, e qu'ela l'avia dig per enguan qu'ela·l volia amar. E se penset qu'el anes ancaras merce clamar a ma dompna Maria.

Et per tolr[e] [l]o d'aqel pensamen et d'aqel' ira, ma dompna Maria de Ventadorn si·l [e]scomes de tenson dis enaisi con vos auziretz.