Texto
Quadruplum
Jolïement en douce desirree
Qui tant m’a souspris,
J’aim la blondete
Doucete
De pris,
Comme celi ou j’ai mis ma pensee.
Hé! s’en chanterai doucement pour s’amistié.
Acoler et baisier
M’a cousté et coustera.
Ja vilein part n’i avra:
Nostra sunt sollempnia,
Car trop biau deduit i a.
C’est trop douce vie
Que que nus en die,
De baisier, d’acoler,
De rire et de jouer
A sa douce amie.
Trop fait a proisier
Qui l’a sans dansgier,
Mes l’amor devee
Ait courte duree.
Mal ait amors ou pitié
Et douçor n’est trovee.
Triplum
Quant voi la florete
Naistre en la pree,
Et j’oi l’aloete
A la matinee
Qui saut et halete,
Forment m’agree!
S’en dirai chançonete:
Amouretes,
Amouretes
M’ont navré.
En non Dé,
Li cuers mi halete
En joliveté:
S’ai trové
Amouretes a mon gré;
Jolivement,
Cointement,
Soutivment
M’ont le cuer emblé
Et enamouré
Tant doucement.
Pour noient
Maintieg ceste abeïe:
Trop use ma vie
En grief tourment;
Je ne vivrai mie
Longuement.
Motet
Je sui jolïete,
Sadete, pleisans
Joine pucelete:
N’ai pas quinze ans,
Point ma mamelete
Selonc le tans:
Si deüsse aprendre
D’amors et entendre
Les samblans
Deduisans;
Mes je sui mise en prison.
De Diu ait maleïçon
Qui m’i mist!
Mal et vilanie et pechié fist
De tel pucelete
Rendre en abïete.
Trop i mefist,
Par ma foi;
En relegion vif a grant anoi -
Diex! -car trop sui jonete.
Je sent les doz maus desoz ma ceinturete:
Honnis soit de Diu qui me fist nonnete!
Tenor: APTATUR