Texto
I
Jherusalem, grant damage me fais,
Qui m’as tolu ce que je pluz amoie.
Sachiez de voir ne vos amerai maiz,
Quar c’est la rienz dont j’ai pluz male joie;
Et bien sovent en souspir et pantais
Si qu’a bien pou que vers Deu ne m’irais,
Qui m'a osté de grant joie ou j’estoie.
II
Biauz dous amis, com porroiz endurer
La grant painne por moi en mer salee,
Quant rienz qui soit ne porroit deviser
La grant dolor qui m’est el cuer entree?
Quant me remembre del douz viaire cler
Que je soloie baisier et acoler,
Grant merveille est que je ne sui dervee.
III
Si m’aït Deus, ne puis pas eschaper:
Morir m’estuet, teus est ma destinee;
Si sai de voir que qui muert por amer
Trusques a Deu n’a pas c’une jornee.
Lasse! mieuz vueil en tel jornee entrer
Que je puisse mon douz ami trover
Que je ne vueill ci remaindre esguaree.