Texto
I
Onqes n’amai tant que jou fui amee;
Or m’en repent, se ce peüst valoir,
Q’amours m’avoit au meillour assenee,
Pour toute hounour et toute joie avoir,
Et au plus bel de toute la contree;
Mais ore a il autrui s’amour dounee,
Qi volentiers a soi l’a retenu.
Lasse, pour koi fui je de mere nee!
Par mon orguel ai mon ami perdu.
II
Si me doint Dieus d’amours longe duree,
Que je l’amai de cuer sans decevoir,
Qant me disoit k’iere de li amee,
Mais n’en osai ains descouvrir le voir:
Des mesdisans doutoie la noumee.
Biau sire Dieus, baisie et acolee
M’eüst il or et aveuc moi geü;
Mais q’il m'eüst sans plus s’amour dounee,
Si m’eüst bien tous li siecles veü.
III
Or m’a amours malement assenee
Qant çou que j’aim fait a une autre avoir,
Ne ne m’an laist retraire ma pensee,
Ne si n’en puis soulas ne joie avoir.
Lasse, l’amour que tant li ai veee
Li seroit ja otroiie et dounee;
Mais tart l’ai dit, car je l’ai ja perdu;
Or me convient amer sans estre amee,
Car trop ai tart mon felon cuer vaincu.