I
'Sîne klâwen
durch die wolken sint geslagen,
er stîget ûf mit grôzer kraft;
ich sich in grâwen
tegelîch, als er wil tagen:
den tac, der im geselleschaft
erwenden wil, dem werden man,
den ich mit sorgen în verliez.
Ich bringe in hinnen, ob ich kan.
Sîn vil manigiu tugent mich daz leisten hiez.'  

II
'Wahtaer, dû singest,
daz mir manige vreude nimt
unde mêret mîn klage.
Maer dû bringest,
der mich leider niht gezimt,
immer morgens gegen dem tage.
Diu solt dû mir verswîgen gar.
daz gebiut ich den triuwen dîn.
des lôn ich dir, als ich getar,
sô belîbet hie der geselle mîn.'  

III
'Er muoz et hinnen
balde und ân sûmen sich.
Nu gip im urloup, süezez wîp.
Lâze in minnen
her nâch sô verholn dich,
daz er behalte êre unde den lîp.
Er gap sich mîner triuwen alsô,
daz ich in braehte ouch wider dan.
Ez ist nû tac. Naht was ez, dô
mit drucken an die bruste dîn kus mir in an gewan.'

IV
'Swaz dir gevalle,
wahtaer, sinc und lâ den hie,
der minne brach und minne enpfienc.
Von dînem schalle
ist er und ich erschrocken ie,
sô ninder der morgenstern ûf gienc
ûf in, der her nâch minne ist komen,
noch ninder lûhte tages lieht.
Dû hâst in dicke mir benomen
von blanken armen, und ûz herzen niht.'  

V
Von den blicken,
die der tac tet durch diu glas,
und dô wahtaere warnen sanc,
sî muose erschricken
durch den, der dâ bî ir was.
Ir brüstlîn an brust sî dwanc.
Der rîter ellens niht vergaz;
des wold in wenden wahtærs dôn:
urloup nâh und nâher baz
mit kusse und anders gap in minne lôn.