A sainte Leochade,
la virge glorïeuse,
l'enmielee, la sade,
la douce, la pieteuse,
devons hui, ce me semble,
faire feste et memoire.

(...)

Leochade, deprie
a la dame des angres,
c'est la virge Marie
qui siet sor les archangres,
par sa grant cortoisie
si parfez touz nous face
qu'en pardurable vie
veoir puissons sa face.

Las, las, por quoi me remuai,
quant je ma dame perdue ai,
la virge Leochade,
qu'amoie tant de tout mon cuer?
Revenez tost, ma douce suer,
ma douce amie et sade!

(...)

Virge, revien sanz delaier!
Par ton mostier tout estraier
vont criant ti malade.
Plourant me dïent li auquant:
"Las, verrons mai ne tant ne quant
de sainte Leochade?"

(...)

Anemis, bien m'as abatu,
bien m'as en grant duel embatu.
Rugiens leo, qu'a de
malice en toi, quant assembler
fesis larrons por moi embler
la bele Leochade!

Lez ceste crois mult douz baing a;
troiz jors ou quatre s'i baingna
la virge Leochade.
Jamais n'ert jors n'en soit plus douz
li rivages et li pors touz
et l'iaue plus tres sade.