Ja Dieus mais dompna no·m presen,
sol gart ma dompn' e Mon Joglar!
Dieus gart ma domna e Mon Joglar
e ja mais dompna no·m presen.

Joglar, s'eu ja cautz sabata,
qi no·us ve pauc a cavalgat,
ni sap per qe se debata.

Joglar, Dieus que·us fetz tan be
e·us creix vostre pretz quec dia
vos capdel si co·us cove.

Gen lo·m trais. Sain Johans!
Ar m'en creis talans
don cairai el sol ablasmans!
Ai! Domna prezans,
ar penz qe·us acol en baizans.
Joglar, vostr'enans
voil, e Dieus lo vol mil aitans.

Doussa dona, Amors e Joys
nos ajosten malgrat dels croys.
Jocglar, granren ai meynhs de joy!
Quar no·us vey, en fas semblan croy.

Lengua, non mais! Que trop parlars
fai piegz que pechatz criminaus;
per qu'ieu·m tenrai mon cor enclaus.
Mas be·l sabra Mos Belhs Jocglars;
qu'ilh val tant, e m'es tan coraus,
que ja de lieys no·m venra maus.
E mos vers tenra, qu'era·l paus,
a Rodes, don son naturaus.

Ai! Co·m fail quan pes del dous ser
lo sens e l'auzir e·l vezer!
Quan la candela·m fetz vezer/¡
vos baizan rizen, a! cal ser!
Joglar, ades mati e ser
me tira·l cors vostre vezer.

Per enseignamen m'azaut
de moutz qe·m fan de lur chaut.
Joglars, per qe·m desazaut?
Ma dompna e vos mi faitz baut.

Dompna, renovell nostre jais
si·us platz; que viu, si be·m fas gais,
ab manz durs doloiros pantais.
Joglar, vos avetz pro oimais,
et eu planc e sospir et ais.

Joglar, fe qed eu dei
a Dieu ni a ma donna ni a mei,
qazutz son en esfrei
q'ar mais ancor non vei
lieis a cui totz m'autrei
per ar e per totz tems.

La forsa c'ai en las ancas
perda ieu, e·l fetg' e·l fel,
s'ieu trop pel agues ferran
non fezes guerr' e deman.
Jotglar, Dieus nos gart d'enguan
sitot ilh non fan deman.

S'il cors es pres, la lengua non es preza;
donx dir puesc ieu so qu'ieu meils volgra far.
Mais ieu poirai m'en en Dieu fiansar,
et aprop Deu, m'en fi en Mon Jotglar:
qu'en els ar es tot del meu desliurar.
(...)
Que m'avetz tout tres mes, so puesc comdar;
tuit devon dir — fe que dei Mon Jotglar!—
(...)
Non agratz pro raubat en Mon Jotglar?
Voletz donx mai?  No n'avetz pro, so·m par.
Fol, deme·us prec, qar merce vos ai queza
que no·m volcsetz del tot adreiturar,
c'ab sol mon dreg no·m podetz ben paguar:
si per dreg fos, non agratz Mon Jotglar.