I
'Wol hôher danne rîche   bin ich alle die zît,
sô alsô güetlîche   diu guote bî mir lît.
si hât mich mir ir tugende
gemachet leides vrî.
ich kom ir nie sô verre   sît ir jugende,
ir enwaere mîn staetez herze   ie nâhe bî.'

II
"Ich hân den lîp gewendet   an einen ritter guot,
daz ist alsô verendet,   daz ich bin wol gemuot.
daz nîdent ander vrouwen
unde habent des haz
und sprechent mir ze leide,   daz si in wellen schouwen.
mir geviel in al der welte   nie nieman baz."