Text
I
L’autrier estoie en un vergier,
S'ohi deus dames consoillier
Tant qu'eles pris-trent a tancier
Et lor paroles a haucier.
Acotez fui, lez un rosier,
Desoz une ente florie.
Dist l'une a l'autre:
« Conseil quier
D'un mauvais qui m'aimme et prie
Pour loier.
Amerai je donc chevalier
Coart por sa menantie ? »
II
« Uns autres me refait proier,
Frans et cortois et beaux palliers,
Et quant il reva tornoier
En son païs moillor ne quier.
Sages est et tient son cors chier,
Sanz orguil et sanz folie.
Mais il n'avroit d'amors mestier
Qui tort a merchëandie.
Au premier
Li fui cruelx a l'acointier
Por le mauvais qui me prie. »
III
Dit la bone: « Je di par droit
Que tres bele dame amer doit
Bons chevaliers, s'ele aperçoit
Que fins et lëaus vers li soit.
Et cele cui avoirs déçoit,
Dame ne l'apel je mie:
Garce est, puis que l'en seit et voit
Que por loier s'est honie.
Qui la croit
Fox est et sa folie boit,
Quant de l'argent l'a saisie. »
IV
Dit la fause: « Qui vos creroit,
De mesaise et de fain morroit.
N'aing pas chevalier qui tornoit
Et erre et despent et acroit
Et en yver se muert de froit,
Quant sa creance est faillie.
Ne quier que mes druz peceoit
Grosse lance por s'amie,
Orendroit
Prenez l'onor et je l'esploit :
Si verrons la mieuz garnie. »
V
Tais toi, pute, va bordeler!
Je ne te puis plus escouter.
Puis que tu vuez a mal aler,
Nuns ne t'en porroit destorber.
Cornent porras tu endurer
En ton lit vil compaignie?»
Li voloit l'un des eulx crever.
Mais Gaces nou soffri mie
Au torner,
Ainz li ala des poins oster :
De tant fist il vilenie.
5 coblas doblas (la última sin par). La rima b es fija en -ie.