Text
I
L'autrier, al quint jorn d'Abril,
Trobiei pastorela
A l'onbreta d'un espi,
Avinent e bella.
Que chant e favella
.I. sonet de Castella;
Que plus humieu
Non n'a en mieu
Vestida d'un negre sarzieu,
Mantellet e gonella.
II
Passiei lo traves d'un rieu.
— « Toza, dis ieu, bella,
S'ie·us atruop en luoc aizieu,
Sola, ses parella,
Sabrai s'est piusella
En l'erbeta novela. »
— « Ai, Senher Dieu!
En vos mi plieu,
C'aitant cant aurai parent vieu
Non serai ribaudella. »
III
« — Toza, intrem el gardi,
Fares cortezia,
E farem .I. juoc d'amor
Que cascuns s'en ria.
Si a vos plazia
Que vos fosses m'amia,
Serem aisi,
Cada mati,
Enans soleill levat, aissi,
E tenrem goi tot dia. »
IV
— « Ben entent vostre lati,
Seinher, cal que sia;
Perdut aves lo cami;
Tenes vostra via!
Que·l mia paria
Vos torn'ar'a folia...
Per Sant Marti,
Si fas vas mi,
Auziran o tut mieu vezi,
E sara vilania! »
V
— « Toza, el temps de Pascor,
Per fin alegratge
Can s'alegran entre lor
L'auzellet salvaje
Dins per lo boscage,
E vos per est ombraje
Per la frescor
De la verdor
Farai .I. juoc novel d'amor
Del vostre piusellage. »
VI
— « Seinher, no·m fassas honor
Perdre per follage;
Mon paire·m vol maridar,
Al mieu agradaje,
Mot de gran linhaje
Segon lo mieu barnage;
Anatz alhor
Querre secor,
C'aisel en portera la flor
Que n'aura·l maridage;
VII
Seinher, vos autre janglador
Aures en lo badaje.
6 coblas doblas (con irregularidades) y una tornada de 2 versos. En la edición hay ciertas irregularidades en la rima. Si se edita "abrieu" al final del primer verso, se elimina la irregularidad. En este caso, como propone Levy, se obtiene la rima que indicamos supra donde "c" en las coblas I y III anuncia la que será la rima "a" en el siguiente par de coblas doblas (-i y -or, respectivamente). En el par V-VI, la rima "c" (-ar) se encuentra en la segunda cobla del par (la VI), puesto que no habrá otro par más de coblas.