S'ai Ermoinion choisie,
c'onques rose espennie
ne fut tals ne cristall.
Vers livois, liez et baus,
que sa beltaz m'agrie.

"Beaus dos compains", dist Godefrois,
"por Ermenjon sui si destrois
ke ne sai ke je faice.
La grans jelee ne li frois,
ke j'ai enduré maintes fois,
ne la nois ne la glaice
n'ont pas tainte me faice,
mais cele ki me laice.
Mes oltraiges me doit bien nuire;
avant ier li brisai sa buire,
or m'en a pris en grant desdaig.
En non Dieu, Robin, beaus compaig,
vos chantés et je me complaig;
vos amés joie et je le has.
Vos ne sentés mie les maus d'amer
ausi come je fas.
Vos chantés et je muir d'amer;
ne vos est gaires de ma mort?
Ahi mors, mors, mors,
por quoi m'ochïés a tort?"