Quant li dous estez define
et li frois yvers revient,
que flors et fueille decline
et ces oisiaus n'en souvient
de chanter en bois n'en brueill,
en chantant, si com je sueill,
toz seus mon chemin erroie.
Si oï pres de ma voie
chanter la bele Emmelot:
"Deurenleu, j'aim bien Guiot,
toz mes cuers a lui s'otroie".

Pensis outre une bruiere
errai toute une feuchiere,
desous courtoit la riviere
clere et rade.
une touse blanque et sade
ses mains et son vis i leve.
assise estoit en la greve.
je li demandai son estre :
'sire, jou sui fille a prestre
de la rive lointaine
ma mere ot non Elaine
et j'ai non Emmelos.
geus et baus i a leves
a la roche Guion.
cui donrai je mes amours,
amie, se vous non ?

L'autrier par une ajornee
chevauchai si con moi plot;
fors de Paris a l'antree
truis Robin et Amelot ;
cote ot desciree,
et bien croi que il gelot :
toute eschevelee
s'apuioit a un estoc
desouz la ramee,
si n'ot mie de serquot,
po fu coloree,
car la jalee li tot;
et Robins li flaiolot
a douce alenee
doranlot, un doranlot,
doucement l'a acolee
au miex que li sot ;
'he ! Amelot,
je t'ai tant amee
c'on m'en tient por sot.'

"A, e, o!"
Son frestel, son baston prent;
"a, e, o!"
Chantoit et notoit:
"Je voi venir Emmelot
parmi le vert bois!"

Quant Robins entent Emmelot
et cele sot ke Robins l'ot,
lors resbaudist la joie;
cele enforce son dorenlot
a la clokete et au suflot,
por çou ke Robins l'oie.

Belle Amelot soule an chanbre feloit,
a chanteir prant, ke d'amors li manbroit,
an halt chantait et son amin nommoit.
mal si gardait, sa meire l'escoutoit.
'deus, doneis m'a marit Garin,
mon dous amin.

[...]

Amelot ot ceu ke sa meire dist,
ke ses peires li veult doneir marit.
tant doucemant a gamanteir se prist,
li cuers li falt, si ait geteit un crit.
'deus, doneis m'a marit Garin,
mon dous amin.

Sor sa meire Amelot se pamait.
deus, keil pitiet la meire a cuer en ait !
tout an plorant doucemant la basait,
a redresier trop bien la confortait.
'deus, doneis m'a marit Garin,
mon dous amin.

[...]

La meire errant mandat lou prou Garin,
tant li donat et argent et or fin,
c'ansanble mist et l'amie et l'amin
per lou congiet son signor Lancelin.
Amelot tot ensi Garin
ot, son amin.